एमाओवादी पहिलो परीक्षामै फेल : नेपाल

१४ वैशाख, भक्तपुर । नेकपा एमालेका वरिष्ठ नेता माधवकुमार नेपालले आगामी निर्वाचनमा एमालेले बहुमत ल्याउने दावी गर्नु भएको छ ।

मनमोहन स्मृति दिवसको अवसरमा एमाले १ नम्बर निर्वाचन क्षेत्रीय कमिटी भक्तपुरले शनिबार आयोजना गरेको ज्येष्ठ नागरिक सम्मान कार्यक्रममा नेपनलले निर्वाचनमा एमालेको बहुमत र एमाले सहयोगी पार्टीहरुसमेतको दुई तिहाई बहुमत आउने र यसैले संविधान निर्माण गर्ने बताउनुभयो ।

संविधान बन्न नदिएर एमाओवादी पहिलो परीक्षा मै असफल भएको भन्दै नेपालले भन्नुभयो-’गएको निर्वाचनमा जनताले एमाओवादीलाई मत दिएर पहिलो पार्टी बनाएको काम लागेन, मत पनि खेर गयो, एकै परीक्षामा असफल हुने पार्टीलाई अब मत दिनु हुँदैन, एमालेले बहुमत ल्याए मात्रै संविधान बन्छ ।”

देश संविधानसभाको निर्वाचनमा होमिसकेको बताउँदै उहाँले निर्वाचनका लागि गाउँ अभियान सञ्चालन गर्न कार्यकर्तालाई निर्देशन दिनुभयो । कार्यक्रममा उहाँले जिल्लाका १६ गाविस र दुई नगरपालिकाका ५० ज्येष्ठ नागरिकलाई दोसल्ला ओढाएर सम्मान गर्नुभएको थियो । रासस